Kaszubski Śpiewnik Kościelny

1.  Christus Pón, zmartwëchwstôł,  /  nóm nôdzejã w serca wlôł.  /  Z grobù wstôł, Jezës Pón,  /  żëcé wrócył wszëtczim nóm. Ref.  Alleluja, alleluja!  /  Niech redoscë himn dzys brzmi.  x2 2.  Christus Pón, zmartwëchwstôł,  /  cemnosc ju òdeszła w dôl.  /  Z grobù wstôł, Jezës Pón,  /  jasnosc zesłôł na nasz gón. Ref.  Alleluja, alleluja!  /  Niech redoscë himn dzys brzmi.  x2 3.  Christus Pón, zmartwëchwstôł,  /  ùcznióm sã ùkôzôł sóm.  /  Z grobù wstôł, Jezës Pón,  /  jak òbiecôł, żëcé dôł. Ref.  Alleluja, alleluja!  /  Niech redoscë himn dzys brzmi.  x2 Tekst i melodia:  Piotr Cichosz

1. Kaszëbskô Królewô! Bòżi, snôżi kwiat! /  Panëjesz ju nama hewò òd stalat.  /  Do Ce më sã żôlimë, wiedno mòdlimë,  /  Ò bòkadosc wiarë co dzéń prosymë. Ref. Swiónowskô ( Kaszëbskô ) nasza Matinkò,  /  Na strażë stojimë kòl Ce,  /  Wez prowadzë kaszëbsczi lud,  /  Dze skrzi sã nieba wieczny wid! 2.  Nôswiãtszô Marija, raju pëszny brzôd!  /  Przëstojiwómë Ce, jesmë przë Ce rôd.  /  Ùmòdlë ù Sëna dlô nas niebny môl,  /  Zgòjë grzéchù renë, niech Ce nas mdze żôl! 3.  Ùkòrunowónô, tesknimë do Ce,  /  Króluj nama wiedno, trzëmôj kòle se!  /  A czej nas ju zawòłô Syn Twój przed swój tròn,  /  Barnicą mdzë naszą, przëjim na swój plón. Tekst i melodia:  Jan Trepczyk

1. Reno, czej mòrze sã bùdzy /  Przë letczim parmieniów sklënim  /  Pòdchòdzysz Matkò do lëdzy  /  Zmãchconëch nocnym łowienim. 2.  Kòl pôłnia w mòdrim klédzëkù  /  Të jidzesz so w słuńca blôskù  /  Przé Tobie dzecuszkò nëkô  /  Pò mòrsczim złotawim piôskù. 3.  Pòd wieczór nad brzegã sôdôsz  /  Nad głową chòjna Cë szëmi,  /  Mòrze sã cëchò spòwiôdô  /  Tobie, ze Swôrzewa Pani. 4.  Abò przëjmôsz pielgrzimów  /  Nad naszim kaszëbsczim mòrzã  /  Co jidą w próg Twi swiątnini  /  Bë złożëc pòczestnosc wierze. 5.  I nama môl przed swim tronã  /  Òstawi Mòrskô Królewò.  /  Dôjże nóm pòdińc z ùkłonã,  /  Pò Twòje mateczné słowò. 6.  Jô witóm waju, Kaszëbi,  /  W swôrzewsczim mòjim kòscele.  /  Mie wiedno barzëczkò lubi  /  Czej widzã tu waju wiele. Tekst:  ks. Bernard Sychta Tłumaczenie:  Eugeniusz Pryczkowski Melodia:  ks. Bolesław Lewińsk

1. Tëli serc òtemkłëch je, /  Tëli głosów spiewac chce.  /  Dobri ò Panie nasz,  /  Co wszëtczich w òpiece môsz. Ref. Të jes widã,  /  Co swiécy nóm w nocë i dnie  /  Co w drodze pòmôgô mie.  /  W mòjim sercu dlô Ce chëcz,  /  Kò tak bëło i tak mùszi bëc. 2.  Dobri w niebie Bóg Òjc wié,  /  Jaczi lud kaszëbsczi je.  /  Dobri, ò Panie nasz,  /  Co wszëtczich w òpiecë môsz. Wëlatiwają te mëslë  /  Jak ptôchë z gniôzda,  /  Mòże zbùdzą serce dze,  /  Móże pòdniesą żôdżel pòrwóny wiatrã  /  Noc mòże zamienią w dzéń. Tëli serc òtemkłëch je,  /  Tëli głosów spiewac chce.  /  Dobri ò Panie nasz,  /  Co wszëtczich w òpiece môsz. Tekst i melodia: Jerzy Stachurski

1.   Tatkù naj, co w niebie jes  /  Barnij mie i mòjã wies.  /  Barnij kòl naj kòżdą chëcz,  /  Barnij stôri, dobri zwëk. 2. Niech na swiece nie mdze zle. /  Dze są lëdze, równo dze,  /  Dobroc niech na swiece mdze  /  Tam dze Të jes, wszãdze je. 3.   Tatkù, baro proszã jô,  /  Nëkôj précz ze swiata zło  /  Wszãdze tam, dze je mój Tatk,  /  Kòżdi człowiek tam je brat. 4.   Zazdrzë Tatkù, w kòżdi nórt,  /  Niech ùcékô zewsząd czôrt,  /  Chtëren szkòdzëc nie mdze mógł,  /  Czej ju wszãdze bãdze Bóg. Tekst:  Alojzy Nagel Melodia: Witosława Frankowska

1. Hewò jidze nasz Pón /  Czëc ju są Bòżé kroczi…  /  Wnetka przińdze dac nóm  /  Niebną drogã òbôczëc… Ref.  Pòjce, Panie… Pòjce, Panie x2 2.  Spieszi, chòcó nad Nim  /  Wiszą ju czôrné blónë…  /  Naszich grzészësków pich  /  W dôce swiat mô schòwóné… Ref.  Pòjce, Panie… Pòjce, Panie x2 3.  Krziża tacy sã céń  /  Czekô lud na zbawienié…  /  Przërëchtowóny kùmk  /  Jegò żdże Narodzeniô… Ref.  Pòjce, Panie… Pòjce, Panie x2 Tekst i melodia: Tomasz Fopke

1. Widze z wiżawë, chtëren ju wschôdôsz, /  Jak jasné słuneszkò z rena,  /  Prosymë, żebës grzéchù smrocznice  /  Roznëkôł w lëdzczich bënach. 2.   Sënie Dawida, z Dëcha pòczãti  /  W Mariji klinie przeczëstim!  /  Niech zôrno słowa Bòżégò w sercach  /  Pòcznie sã i rozrôstô. 3. Emmanuelu i Zbôwco lëdztwa,  /  Cebie z teskniączką żdajemë,  /  Bò òd Ce bezpiek i òdpùszczenié  /  Najëch win dostóniemë. 4. Wietewkò wërosłô z pnia Jességò,  /  Wëpùscëno z ne kòrzenia,  /  Niech Duch Mądroscë, co Cã òbjimnął  /  Zstąpi na lëdzczé plemiã. Tekst i melodia: br. Zbigniew Joskowski